साम संवाददाता, भीरकोट
२३ पुस २०७८
सूर्योदय क्लब स्याङ्जाको व्यवस्थापन र रूम टु रिडको आर्थिक तथा प्राविधिक सहयोगमा दहथुम माध्यमिक विद्यालयमा अध्ययनरत बालबालिकालाई शैक्षिक सामाग्री सहितको झोला वितरण गरिएको छ । विद्यालयमा अध्ययनरत कक्षा १ का १० जना र कक्षा २ का २४ जना गरि जम्मा ३४ जना बालबालिकालाई सो झोला वितरण गरिएको हो । बालबालिकालाई रुमटुरिड संस्थाको आर्थिक सहयोगमा पठन सिपको विकासका लागि तोतेबोली ब्याग वितरण गरिएको विद्यालयका भाषा शिक्षक  मनिषा कोइरालाले जानकारी दिनुभयो।

घरमै सानो पुस्तकालय स्थापना गरेर बालबालिकाहरूमा स्वतन्त्र रुपबाट पढ्ने सिपको विकास गराउन रमाइला र जीवनोपयोगी कथाहरू समेटिएका पुस्तकहरू वितरण गरिएको सूर्योदय क्लबकी साक्षरता सहजकर्ता अन्जु पौडेल लम्सालले जानकारी दिनुभयो । लम्सालका अनुसार कथाका किताब, कापी , कलम र कलर पेन्सील सहित प्रती विद्यार्थी ३४ थान शैक्षिक सामाग्री वितरण गरिएको हो। कार्यक्रममा सबै बालबालिकाका अभिभावकहरूको समेत उपस्थिति रहेको थियो।रूम टु रिडको आर्थिक तथा प्राविधिक सहयोग र सूर्योदय क्लबको ब्यवस्थापनमा स्याङ्जा जिल्लाका ५५ वटा विद्यालयहरूमा साक्षरता कक्षा संचालन गरिएको छ।