स्मार्ट वालिङ संवाददाता , हरिनास                                              ४ पुस २०७८

हरिनास गाउँपालिकाले बाराही आमा समुहलाई २२ थान पोशाक, ४ वटा टेबल, ३० थान कुर्सी लगायतका समानहरू प्रदान गरेको छ।हरिनास -७ सानडाँडामा आयोजित औपचारिक कार्यक्रमका बिच पालिकाले आमा समुहको मागबमोजिम समुहलाई सहयोग गरेको हो। आमा समुहको मागबमोजिम सहयोग गरेकोमा समुहकी अध्यक्ष शर्मीला बि.क.ले पालिका अध्यक्ष खिमनारायण मानन्धरलाई विशेष धन्यवाद व्यक्त गर्नुभयो।कार्यक्रममा बोल्दै गाउँपालिका अध्यक्ष मानन्धरले स्थानीय सरकारले हरिनासमा विकासको अनुभूति गराएको बताउनुभएको छ। जनताले भने अनुसार काम गरे मात्र जनताको प्यारो बन्न सकिने प्रष्ट पार्दै अध्यक्ष मानन्धरले बोलेर मात्र भन्दा पनि काम गरेर देखाए मात्र जनताले नेतालाई विश्वास गर्ने बताउनुभयो । उहाँले हरिनास गाउँपालिकामा एक घर एक धारा अभियानको प्रभावकारी कार्यान्वयन भैरहेको र सबै ठाउँमा खानेपानीको सुविधा पुर्‍याउने पालिकाको लक्ष्य रहेको बताउनुभयो।हरिनासमा सबैका घरघरमा बाटो पुगेको दाबी गर्दै उहाँले बाटोघाटो निर्माण , शिक्षा , स्वास्थ्य र कृषिलाई प्राथमिकतामा राखेर पालिकाले काम गरिरहेको जानकारी समेत दिनुभयो।
कार्यक्रममा बोल्दै समाजसेवी हेमु रानाले आफ्नो सामाजिक तथा राजनीतिक जीवनको चर्चा गर्दै लकडाउनको समयमा  जनतालाई राहत बाँडेर सहयोग गरेको स्मरण गर्नुभएको थियो।जनताको सुख दु:खमा साथ दिन पाउँदा आफ्नो मन प्रफुल्ल हुँने बताउँदै उहाँले हरिनासमा एम्बुलेन्स संचालनका लागि आफूले सक्दो सहयोग गर्ने बताउनुभएको थियो।वडा अध्यक्ष केशमाया थापा,वडा सदस्य धनमाया राना लगायतका जनप्रतिनिधि र समाजसेवीहरूको उपस्थिति रहेको कार्यक्रम संचालन मित्र ढुंगानाले गर्नुभएको थियो।