साम संवाददाता , भीरकोट १८ पुस २०७८

राष्ट्रिय परिचयपत्र तथा पंजीकरण विभाग सिंहदरबार, काठमाण्डौ र जिल्ला प्रशासन कार्यालय स्याङ्जाको संयुक्त आयोजनामा भीरकोट नगरपालिकामा १ दिने राष्ट्रिय परिचयपत्र अभिमुखीकरण तथा रुजु अधिकारी तालिम सम्पन्न भएको छ। राष्ट्रिय परिचयपत्र अभिमुखीकरण तथा रूजु अधिकारी तालिममा प्रमुख जिल्ला अधिकारी राजु प्रसाद पौडेलले नगरपालिकाका जनप्रतिनिधि र कर्मचारीहरूलाई राष्ट्रिय परिचयपत्र सम्बन्धि सम्पूर्ण विषयवस्तु समेटेर डिजिटल प्रस्तुति मार्फत प्रशिक्षण दिनुभएको थियो। नगरप्रमुख छायाराम खनाल, उपप्रमुख सिमा के.सी कर्माचार्य ,जिल्ला प्रहरी कार्यालय स्याङ्जाका प्रहरी नायव निरीक्षकको समेत उपस्थिति रहेको कार्यक्रमको संचालन प्रेम रेग्मीले गर्नुभएको थियो।

नेपाली नागरिकताको प्राप्त गर्ने उमेर पुगेका सबैले राष्ट्रिय परिचय पत्रका लागि आवेदन दिन सक्छ्न्। राष्ट्रिय परिचय पत्रको लागि वालिङ नगरपालिका, कालीगण्डकी गाउँपालिका र पुतलीबजारमा नगरपालिकामा नागरिकहरूको तथ्याङ्क संकलनको जारी छ । भीरकोटमा पनि राष्ट्रिय परिचय वितरणको काम केहि दिनमा नै सुरू हुनेछ।