साम संवाददाता, भीरकोट ८ माघ २०७८

भीरकोटमा रहेका गायन प्रतिभाहरूको खोजी गर्ने उद्देश्यले संचालित गायन प्रतियोगिता “भीरकोट सिङ्गिङ आइडल” २०७७ को पुरस्कार वितरण गरिएको छ । आज भीरकोट नगरपालिकामा आयोजित विशेष समारोहमा विजेताहरूलाई नगद पुरस्कार सहित सम्मान गरिएको हो ।

भीरकोट सिङ्गिङ आइडल प्रतियोगितामा प्रथम हुनुभएका आविद अलिले रू ३० हजार नगद सहित अडियो रेकर्ड र म्युजिक भिडियो बनाउने अवसर प्राप्त गर्नुभएको छ । यसैगरी द्वितीय हुनुभएका रोशन बि.सी ले नगद रू २० हजार पुरस्कार सहित निशुल्क अडियो रेकर्ड र भिडियो रेकर्डमा ५०% छुटको अवसर प्राप्त गर्नुभएको छ। तृतीय स्थान प्राप्त गर्नुभएकी आरती कुँवरले नगद रू १० हजार र निशुल्क अडियो रेकर्डको अवसर प्राप्त गर्नुभएको छ । प्रतियोगितामा सान्त्वना स्थान प्राप्त प्रशंसा श्रेष्ठ रू ५ हजार नगद पुरस्कार प्राप्त गर्नुभएको छ । विजेता सम्पूर्णलाई प्रमुख अतिथी एवं नगर प्रमुख छायाराम खनालले पुरस्कार प्रदान गर्नुभएको थियो ।

पुरस्कार वितरण समारोहमा बोल्दै नगर प्रमुख खनालले कला संस्कृति संरक्षणमा र बाल प्रतिभाको प्रस्फुटनमा नगरपालिका सदैव लागीपर्ने प्रतिबद्धता व्यक्त गर्नुभएको थियो। आयोजक खिलुङ कालिका म्युजिक प्रा.लि.का अध्यक्ष राम कुमार “विन्दास“ ले स्याङ्जा जिल्ला संगितमय बनाउने र प्रतिभा प्रस्फुटन गराउनु आफ्नो पहिलो प्राथमिकता रहेको बताउनुभएको थियो।कार्यक्रममा सलिना थापा मगरले आफ्नो नृत्य समेत प्रस्तुत गर्नुभएको थियो । बालमैत्री भीरकोट नगरपालिका गायन प्रतियोगिताको मुख्य प्रायोजक रहेको थियो ।