स्याङ्जा, पौष २, युवराज पौडेल

 नेपाली काङ्ग्रेसको १४ औं महाधिवशेन सकिए पनि मतगणनाको परिणाम आउने क्रम जारी नै रहेका बेलामा स्याङ्जा जिल्लाका लोकप्रिय युवा नेता तथा गण्डकी प्रदेश नेपाली काङ्ग्रेस संसदीय दलका सचेतक माननीय सांसद भागवत् प्रकाश मल्ल पुनः जिल्लाका विभिन्न ठाउँमा जनताका बिचमा पुगिरहनुभएको छ।

१४ औं जिल्ला अधिवेशनमा स्याङ्जा जिल्ला सभापतिमा जम्मा ३२ मत अन्तरले पराजित मल्ल स्याङ्जा काङ्ग्रेसमा लोकप्रिय नेता मानिनुहुन्छ । उहाँले गत २०७४ सालको आम निर्वाचनमा स्याङ्जा जिल्ला निर्वाचन क्षेत्र नं २ ‘ख’ बाट प्रत्यक्षतर्फ विजय हासिल गर्नुभएको थियो । त्यतिबेला स्याङ्जामा प्रत्यक्ष चुनाव जित्ने एकमात्र काङ्ग्रेस उम्मेदवार उहाँमात्रै हुनुहन्थ्यो ।

तरुण दल स्याङ्जाका अध्यक्ष समेत रहनुभएका सांसद मल्ल महाधिवेशनभन्दा अघि पनि स्याङ्जाका विभिन्न गाउँबस्तीमा पुग्नुभएको थियो । महाधिवेशनमा आफूलाई मतदान गर्नेहरुलाई धन्यवाद दिन पनि उहाँ यतिबेला गाउँबस्तीमा पुग्नुभएको छ । सांसद तथा गण्डकी प्रदेश सचेतक भएर पनि पद र प्रोटोकलभन्दा जनतासँगको सम्बन्धलाई महत्वपूर्ण ठान्ने सरल स्वभावका सांसद मल्ल यतिबेला पुनः गल्याङ, चापाकोट, वालिङ, भीरकोट लगायतका स्थानहरुमा जनताका बिचमा पुगेर जनतासँग भलाकुसारी गरिरहनुभएको छ ।

बिहिबारमात्र उहाँ गल्याङ् नगरपालिका वडा नं ७ मा पुग्नुभएको छ । सोही ठाउँ निवासी पार्वती पाण्डेका पिताको असामयिक निधनमा मृतकप्रति श्रदाञ्जली दिन र शोकसन्तप्त परिवारजनमा समवेदना दिन मल्लसहितको टोली गल्याङ पुगेको हो । मल्लसहित सो कार्यक्रममा नेपाली काङ्ग्रेसका पूर्व क्षेत्रीय सभापति ईश्वर खाँड, गरिमा विकास बैङ्कका अध्यक्ष श्यामप्रसाद बस्याल, नेपाली काङ्ग्रेसका नेता महेन्द्र श्रेष्ठ, महाधिवेशन प्रतिनिधि चन्द्र रानालगायतका नेता कार्यकर्ताहरुको उपस्थिति रहेको थियो ।