साम संवाददाता , स्याङ्जा
२७ पुस २०७८

नेपाल कम्युनिस्ट पार्टी एमाले स्याङ्जाको आठौं जिल्ला अधिवेशनबाट सूर्यप्रसाद गैह्रे(पारस) विजयी हुनुभएको छ। मंगलबार दिउँसो सम्पन्न मतगणना अनुसार प्रतिस्पर्धी संघीय सांसद समेत रहेका नारायणप्रसाद मरासीनीलाई १ सय ८३ मतले पछि पार्दै गैह्रे एमालेको जिल्ला अध्यक्षमा निर्वाचित हुनुभएको हो।

गेैह्रेले ४ सय ४० मत प्राप्त गर्नुभयो भने उपविजेता मरासिनीले २ सय ५७ मत प्राप्त गर्नुभएको थियो। यसैगरी उपाध्यक्षमा कृष्ण खाँण निर्विरोध विजयी हुनुभएको छ।सचिवमा राजेन्द्र डुम्रेले ३ सय ९४ , उपसचिव विश्व पौडेलले ३ सय ९५ र तारा शर्माले ३ सय ७३ मतसहित निर्वाचित हुनुभएको छ।

सचिवका पदका उपविजेता भूपराज अधिकारीले २ सय ८०, उपसचिवका उपविजेताहरू सन्तोष के.सी. र जीवन पौडेलले क्रमशः ३ सय ४६ र १ सय ५८ मत प्राप्त गर्नुभएको थियो। पाँच पदाधिकारीसहित १ सय ५ पदका लागि १ सय ४३ जना उम्मेदवारहरु चुनावी प्रतिस्पर्धामा हुनुहुन्छ।मरासिनी र गैह्रे प्यानलबिच भएको चुनावी प्रतिस्पर्धामा उपसचिव पदका उम्मेदवार विश्व पौडेल बाहेक अरु सबै गैह्रे पक्षधरका पदाधिकारी निर्वाचित हुनुभएको हो।अन्य पदहरूको मतगणना जारी छ। जिल्लामा ७ सय ९ प्रतिनिधी भए पनि सोमबार भएको मतदानमा ६ सय ९८ मत खसेको थियो।