स्मार्ट वालिङ संवाददाता , भीरकोट
९ पुस, २०७८
भीरकोट नगरपालिकाका वडा कार्यालयहरूमा वडा अध्यक्षहरू र कर्मचारीहरू कार्यालय समयमा वडा कार्यालयमा नभेटिने क्रम बढेको जनगुनासो छ।वडा कार्यालयहरूले सामान्यतया सिफारिस, चार किल्ला प्रमाणित,नाता प्रमाणित, पञ्जीकरण लगायतका कामहरू सम्पादन गर्ने गर्दछ्न् ।काम चाँडो सक्ने अभिप्रायले सेवाग्राही बिहान ठिक १० बजे वडा कार्यालय पुग्दा कार्यालय सहयोगी र रित्ता कोठा, कुर्ची टेबल मात्रै भेटिन्छ्न्।

आज बिहान १०.३० बजे वडा नं ६ को कार्यालयमा पुगेका सेवाग्राहीले कार्यालय सहयोगी मात्रै भेटेको बताउनुभयो।वडा अध्यक्ष र अन्य कर्मचारी कोहि नभेटिएको बताउँदै उहाँले ११ बजेको हाराहारीमा मात्रै आफूले सेवा प्राप्त गरेको बताउनुभयो।वडा नं ८ मा पनि वडा नं ६ कै जस्तो प्रवृती पाइएको एक जना भूक्तभोगी सेवाग्राहीले जानकारी दिनुभयो।

वडाका कर्मचारी बिहान आधी घण्टा ढिलो आउने र बेलुका आधी घण्टा चाँडो जाने गरेको सेवाग्राही तथा प्रत्यक्षदर्शी बताउँछन् ।वडा अध्यक्षहरू विभिन्न कार्यक्रमको बाहनामा कार्यालयमा वा नगरपालिकामा भन्दा पनि अन्यत्र भेटीन्छ्न्।जनताको सेवा गर्ने कसम र प्रतिबद्धता खाएका कर्मचारी र जनप्रतिनिधिको लापरबाहीका कारण सेवाग्राही मर्कामा परेका छ्न् भने भीरकोटमा सुशासन भन्ने कुरा भाषणमा मात्रै सिमित छ भन्ने कुरा प्रमाणित भएको छ।कर्मचारी र जनप्रतिनिधिले सुशासनको धज्जी उडाइरहँदा नियामक निकाय नगर प्रशासन भने मौन देखिन्छ।

यस विषयमा प्रमुख प्रशासकीय अधिकृत खुमलाल भूसाल सँग सम्पर्क गरी कार्यालय समय कति हो भनी प्रश्न गर्दा कार्यालय समय १०- ४ भएको र समयको पालना गर्न कर्मचारीहरूलाई नियमित निर्देशन दिएको बताउँदै नगरमा सुशासन कायम गर्न आफू प्रतिबद्ध भएको दोहोर्‍याउनुभयो।कर्मचारीको कामचोर प्रवृती र लापरबाहीको निगरानी नहुँदा कर्मचारीको मनपरी बढेको सेवाग्राहीको गुनासो छ।