साम संवाददाता, भीरकोट
१७ पुस २०७८

लायन्स क्लब अफ गण्डकी आँधिखोलाको पहलमा भीरकोट नगरपालिकामा अवस्थित पवित्र छायाँक्षेत्रधाम परिसरमा बस्ने जोगी, साधु सन्तहरुलाई न्यानो कपडा तथा खाद्यान्न वितरण गरिएको छ।छाँयाक्षेत्र मन्दिर परिसरमा बस्ने १० जना जोगी,साधु सन्तहरूलाई सिरक, ब्लाङ्केट, हाइनेक, ट्राउजर, म्याट, दाल,चामल तरकारी वितरण गरिएको हो।

भीरकोट उद्योग वाणिज्य संघका अध्यक्ष जगदीश प्रसाद कोइरालाको आतिथ्यता र लायन्स क्लबका अध्यक्ष जीवन शर्मा अर्यालको अध्यक्षतामा सम्पन्न भएको कार्यक्रममा मन्दिर व्यवस्थापन समितिका अध्यक्ष पिताम्बर श्रेष्ठ, लायन्सका सदस्यहरू र समाजसेवीहरूको समेत विशेष उपस्थिति रहेको थियो।

मन्दिर व्यवस्थापन समितिका अध्यक्ष श्रेष्ठले पवित्र छायाँक्षेत्र धामका साधु सन्तहरूलाई जाडोमा न्यानो कपडा वितरण गरेर मानवीय सहयोग गरेकोमा लायन्स क्लबलाई विशेष धन्यवाद दिदै छायाँक्षेत्र धामको महत्त्व र गरिमालाई प्रचारप्रसार गरेर सहयोग गरिदिनुहुन आग्रह गर्नुभएको थियो।यसैगरी प्रमुख अतिथि एवं उद्योग वाणिज्य संघका अध्यक्ष जगदीश प्रसाद कोइरालाले लायन्स क्लबसँग जोडिएर मानवताको सेवामा समर्पित हुन पाएकोमा खुसी व्यक्त गर्नुभएको थियो।क्लबका अध्यक्ष जीवन शर्मा अर्यालले न्यानो कपडा तथा राहत वितरण कार्यक्रममा प्रत्यक्ष अप्रत्यक्ष तरिकाले सहयोग गर्ने उद्योग वाणिज्य संघका पदाधिकारी , समाजसेवी लगायत सम्पूर्ण महानुभावहरूलाई धन्यवाद तथा आभार व्यक्त गर्नुभएको थियो।