स्मार्ट वालिङ संवाददाता
१ पुस २०७८
आगामी स्थानीय चुनावलाई लक्षित गरेर निर्वाचन आयोगले संचालन गरेको फोटो सहितको मतदाता नामावली संकलन विशेष कार्यक्रम -२०७८ का दौरान स्याङ्जामा हालसम्म करिब ४००० नयाँ मतदाताको नामावली संकलन गरिएको छ।मङ्सिर १७ देखि २६ सम्म स्याङ्जाका ५ वटा स्थानीय पालिकाको केन्द्रमा संचालित मतदाता नामावली संकलन कार्यक्रममा १५२७ महिला र २१७७ पुरूष गरी जम्मा ३७०४ जनाको नामावली संकलन भैसकेको जिल्ला निर्वाचन कार्यालय स्याङ्जाले जनाएको हो।
जिल्ला निर्वाचन कार्यालय स्याङ्जाका अनुसार आँधिखोला गाउँपालिकामा सबैभन्दा कम जम्मा ३६६ जनाको मतदाता नामावली संकलन भएको छ भने चापाकोट नगरपालिकामा सबैभन्दा बढी ११०२ जनाको नामावली संकलन भएको छ।यसैगरी भीरकोट नगरपालिकामा ६८९, गल्याङमा नगरपालिकामा ९५७ र विरूवा गाउँपालिकामा ५९० जनाको नामावली संकलन गरिएको जनाइएको छ।

अर्जुनचौपारी गाउँपालिका, फेदिखोला गाउँपालिका, हरिनास गाउँपालिका र कालीगण्डकी गाउँपालिकाको केन्द्रमा मंसिर २८ गतेदेखि सुरू भएको मतदाता नामावली संकलन पुस ८ गतेसम्म जारी रहने बताइएको छ।जिल्ला निर्वाचन कार्यालय स्याङ्जा, जिल्ला प्रशासन कार्यालय स्याङ्जा र इलाका प्रशासन कार्यालय वालिङमा नियमित रूपमा मतदाता नामावली संकलनको काम भैरहेको जिल्ला निर्वाचन कार्यालय स्याङ्जाले जनाएको छ।मताधिकार प्रयोग गर्न १८ वर्ष उमेर पुग्नुपर्ने भए पनि १६ वर्ष उमेर पुगेर नेपाली नागरिकताको प्रमाणपत्र लिएका सबै नागरिकले मतदाता नामावलीमा नाम दर्ता गराउन सक्ने कार्यालयले जनाएको छ।नयाँ मतदाताहरूलाई समयमै नाम दर्ता गराइ मताधिकार सुनिश्चित गर्न निर्वाचन कार्यालयले अनुरोध गरेको छ।