साम संवाददाता, वालिङ
१ माघ २०७८

वालिङका संस्थागत तथा सामुदायिक दुबै शैक्षिक संस्थाहरू माघ २ गतेदेखि बन्द हुने भएका छ्न्। बढ्दो कोराना संक्रमणका कारण विद्यालयमा भौतिक उपस्थितिमा पठनपाठन बन्द गर्न निर्देशन दिइएको नगर शिक्षा शाखा प्रमुख बाबुराम सापकोटाले जानकारी दिनुभयो।भौतिक उपस्थितिमा पठनपाठन बन्द भएपनि सिकाइ सहजीकरण निर्देशिका-२०७७ अनुसार सिकाइ सहजीकरण गर्न शिक्षा शाखाले विद्यालयहरूलाई अनुरोध गरेको छ।वालिङ नगरपालिका कोराना महामारीको तेस्रो लहरका कारण
शैक्षिक संस्था बन्द गर्ने स्याङ्जाको दोस्रो  पालिका हो।पुतलीबजार नगरपालिका यस सम्बन्धमा निर्णय गर्ने पहिलो पालिका हो।पुतलीबजारले  २७ गते नै विद्यालय बन्द गर्न निर्देशन दिइसकेको थियो।

वालिङ नगर क्षेत्रमा कोभिड १९ को संक्रमण संगै नयाँ भेरियन्ट पनि देखिएको बताउँदै विद्यार्थीहरूको स्वास्थ्य सुरक्षा र बचावटलाई ध्यानमा राखेर वार्षिक वा हिउँदै विदामा मिलान गर्ने गरि माघ १५ सम्म विद्यालय बन्द गर्न निर्देशन दिइएको नगरपालिकाले जनाएको छ। संक्रमण बढ्दै गएपछि संस्थागत विद्यालयहरू भर्चुअल कक्षाको तयारी गरिरहेका छ्न्।

बालमैत्री नगरपालिका भीरकोटमा भने संक्रमणको जोखिम खासै नरहेको जनाउँदै स्वास्थ्य सुरक्षा मापदण्ड पालना गर्दै विद्यालय संचालन गर्न निर्देशन दिइएको छ।