स्याङ्जा, पौष २, युवराज पाैडेल

स्याङ्जा जिल्ला सदरमुकाममा रहेको त्रिभुवन आदर्श नमुना माध्यमिक विद्यालयले आफ्नो वार्षिकोत्सव तथा अभिभावक दिवसको पूर्व सन्ध्यामा विद्यार्थीहरुका बिच आन्तरिक खेलकूद गतिविधिहरु सञ्चालन गरी सम्पन्न गरेको छ ।

स्याङ्जाको मालेबगर खेलमैदानमा दुई दिनसम्म सञ्चालित विभिन्न खेलकुद प्रतियोगिताहरुमा विद्यार्थीहरुको उल्लेख्य सहभागिता रहेको विद्यालयका प्रधानाध्यापक मुक्तिप्रसाद रेग्मीले बताउनुभयो ।

प्रातकालीन सत्र र दिवा सत्र गरी दुई चरणमा सञ्चालित खेलकुदमा फुटबल भलिबल, हाइजम्प, लङ्जम्प, म्याराथुन दौड लगायतका प्रतियोगिता सञ्चालन भएका थिए । प्रातःकालीन सत्रमा भएको अन्तरसङ्काय फुटबलमा व्यवस्थापन सङ्काय प्रथम र इन्जिनियरिङ सङ्काय द्वितिय भएका छन् । भलिबलमा शिक्षा सङ्काय प्रथम र व्यवस्थापन सङ्काय दोस्रो भएका छन् । छात्रातर्फ भलिबल र फुटबल दुवैमा व्यवस्थापन सङ्काय विजयी भएको छ ।

दिवा खेलतर्फ अन्तरसदनात्मक खेलकुद कार्यक्रममा जम्मा ६ वटा सदनहरुबाट फुटबलमा सिनियरतर्फ ६ टिम र जुनियरतर्फ ६ टिम गरी जम्मा १२ टिम प्रतिस्पर्धामा थिए भने भलिबलतर्फ १२ टिम गरी जम्मा २४ टिमको सहभागिता रहेको विद्यालयका शिक्षक अर्जुन पौडेलले बताउनुभयो । त्यस्तै विद्यालयका शिक्षकहरुका बिचमा पनि मैत्रीपूर्ण फुटबल प्रतियोगिता भएको पौडेलले जानकारी दिनुभयो ।

फुटबलमा छात्रतर्फ ब्लु हाउस र ह्वाइट हाउस प्रथम भएका छन् भने छात्रातर्फ ह्वाइट हाउस प्रथम भएका छन् । भलिबल छात्रतर्फ ह्वाइट हाउस प्रथम र पर्पल हाउस द्वितीय भएका छन् । त्यस्तै भलिबल छात्रातर्फ ह्वाइट हाउस प्रथम भएको खेलकुद संयोजक शिक्षक विपी पोख्रेलले जानकारी दिनुभयो ।