स्मार्ट वालिङ संवाददाता, हरिनास
९ पुस २०७८
आगामी स्थानीय निर्वाचनलाई लक्षित गरेर निर्वाचन आयोगले हरिनास गाउँपालिकाको केन्द्रमा संचालन गरेको फोटो सहितको मतदाता नामावली संकलनमा करिब ११०० भन्दा बढी नयाँ मतदाता थपिएका छ्न्।गाउँपालिकाको सूचना अधिकारी बिदुर सिग्देलका अनुसार हरिनासको केन्द्र चित्रेभञ्जाङमा यहि मङ्सिर २८ गते देखि पुस ८ गते सम्म संचालित मतदाता नामावली संकलन अभियानमा ११३६ नयाँ मतदाता थपिएका हुन्।जसमध्ये ६५९ पुरूष र ४७७ महिला रहेका छ्न्।

जिल्ला निर्वाचन कार्यालय स्याङ्जा, जिल्ला प्रशासन कार्यालय स्याङ्जा र इलाका प्रशासन कार्यालय वालिङमा नियमित रूपमा मतदाता नामावली संकलनको काम भैरहेको जिल्ला निर्वाचन कार्यालय स्याङ्जाले जनाएको छ।मताधिकार प्रयोग गर्न १८ वर्ष उमेर पुग्नुपर्ने भए पनि १६ वर्ष उमेर पुगेर नेपाली नागरिकताको प्रमाणपत्र लिएका सबै नागरिकले मतदाता नामावलीमा नाम दर्ता गराउन सक्ने कार्यालयले जनाएको छ।नयाँ मतदाताहरूलाई समयमै नाम दर्ता गराइ मताधिकार सुनिश्चित गर्न निर्वाचन कार्यालयले अनुरोध गरेको छ।